Xhjoche jaha'k'oj Stzoti' Komam Dios yul sq'ab' anma han, yinh jab'xub'al Popti', anma ay yul Konhob' Xajlaj b'oj sunil hej swayanhb'alil, yunhe chuh skuyni anma, kat yohtajnheniloj Stzoti' Komam, haktu' chuh ya'noj yuluj sk'ul yinh kat skolchahoj.
Sunilojab' anma chuh yab'en Stzoti' Komam Dios yinh yab'xub'al, haxkam xhjila ta kaw tx'ihalto anma mach kaw helanoj yinh stzoti' wes. Q'a' k'ultu b'oj q'a' xuq'tu jab'en stzoti' Komam yinh jab'xub'al.
Yuxin kaw ay syilalil ta chab’e anma Stzoti' Komam yinh yab'xub'al. Xhjochepax han ta nixhtej kuyum hum chuh yilni te', kat skuyni te' yul sunil hej b'ay ch'a'lax kuyum.
